كيفية النجاح فى |الدراسة الجامعية| بأقل مجهود وأكثر استفاده؟أسرار النجاح فى الدراسة الجامعية.

روشتة لكيفية النجاح فى فترة الكلية والأستفادة بدرجة كبيرة بحيث تفيدك فى سوق العمل وفى الحياة العملية.أسرار النجاح فى الدراسة الجامعية،مهارات الدراسة فى الجامعة ، كل ده هنذكره فى المقالة وكلها عبارة عن خبرات خريجين متفوقين

السلام عليكم متابعى مدونة خبرات خريج فى هذه المقاله سوف ندخل الى موضوع فى غاية الأهمية بل هو كل شىء وهو كيفية النجاح فى فترة الكلية والأستفادة ايضا بدرجة كبيرة تفيدك فى سوق العمل وفى الحياة العملية.

أكيد الكل فى فترة الثانوية  كان بيذاكر مذاكرة من نار بمعنى الكلمة علشان يدخل الكلية اللى هو عاوزها أو اللى بيحبها وشايف نفسه فيها .فى فترة الثانوية كنت حضرتك بتعتمد على المدرسين وعلى الدروس الخصوصية ; ممكن كنت بتاخد درس أو اثنين فى المادة الواحده  علشان تعرف تذاكر المادة كويس ومضيعش

ولا درجة.احب اقولك أن الكلية بتختلف كتير عن فترة الثانوية أو عن فترة دراستك كلها فيما سبق على الرغم أن الكلية برده ممكن تأخد فيها دروس خصوصية بنسميها فى الكلية (قرص فى المادة كذا) بس صدقنى عن تجربه هتكون خسران معلومات وفلوس لو أعتمد على القرصات ومش هتعرف تساعد نفس بعد كده فى الشغل اللى هتشتغلة. كل اللى بيتقال ده ويتكتب بناءا على خبرة فى الشغل وفى سوق العمل ومعظم الخريجين اللى اشتغلوا بيقولوا ياريت نرجع تانى فترة الكلية علشان نستفيد أكثر ....بس قل للزمان ارجع يازمان.

المهم فى الموضوع أنك لما تدخل الكلية اللى أنت عاوزها أو اللى التنسيق رشحها ليك سواء كنت بتحبها أو لا ،لا تعتمد على بعض الأشياء ولاتكن مغرور وهم:

·        لا تعتمد على درجة الذكاء الخاصة بيك فى الثانوية العامة وتقول أنا حصلت على مجموع عالى، كده أنا ذكى،أحب أقولك لو أنت بتفكر كده هتصعب عليك الموضوع كله.

·        لا تعتمد على الدرجات العالية اللى كنت بتحصل عليها فى فترة الدراسة السابقة للكلية لان فى الكلية عاوزك تستفيد أكثر ما تحصل على درجات عالية أو تقديرات عالية على الفاضى ،بمعنى تذاكر كلمتين وتروح تحطهم فى ورقة الأجابة وخلاص كده وتخرج من الأمتحان وأنت ناسى كل حاجة فى المادة.

فيه شوية حاجات كده علشان ماتتصدمش لما تدخل الكلية لازم تعرفهم عن الدراسة وهم:

1)    اللغة الرسمية المعتمده فى الكلية هى اللغة الانجليزية ،يعنى معظم الكتب هتكون مكتوبة بالانجليزية ،الا اذا كانت الكلية الدراسة فيها باللغة العربية مثل (تربية –أداب ......)

2)    لكل ماده كتاب فى حدود 250-400 صفحة لازم يخلصوا فى حوالى 3 شهور علشان الأمتحان.

3)    ممكن الدكتور يترك بعض النقاط بدون شرح ويقول ليكم النقاط دى تذاكروها بنفسكم يعنى(self-study)  وهيجى منها فى الأمتحان.

4)    كل فترة الدكتور هيطلب منكم تقاريرتعملوها وتقدموها علشان يضع عليها أعمال السنة.

اكيد معظم الطلاب اللى لسة فى سنة أولى كلية لما تلاقى أن الدراسة فى الكلية مختلفة عن الدراسة فى المراحل السابقة بتخاف وتقول هل ممكن أنى انجح فى الكلية وأتخرج منها؟ ويدعى ويقول يارب أنا عاوز اتخرج بس.لا أنت ان شاء الله هتنجح وهتستفيد من دراستك فى الحياة العملية وسوق العمل، تابعنا فى المقالات القادمة.

علشان كده هنقول بعض خبرات ونصائح الخريجين المتميزين للنجاح فى الدراسة الجامعية بكل سهولة وتكون مستفيد :-

1)  أدارة الوقت:

الوقت اهم شىء لازم تحافظ عليه بكل الطرق.بمعنى هيكون فية وقت لحضور المحاضرات ووقت أخر لعمل الأنشطة الطلابية ،وأخر للخروج مع الاصدقاء  وهكذا.أنت الوحيد القادر على تنظيم وقتك على حسب اهتماماتك يعنى متعملش حاجة غيرك بيعملها لأن كل واحد بيختلف عن الثانى فى التفكير والأهتمامات .ولازم تتعلم أزاى تحافظ عليه وازاى تقول (لا)على شىء أنت مش عاوز تعمله لأن ده هيكون على حساب دراستك وأهتماماتك بس لازم تقولها بطريقة كويسه ولبقه.لأنك هتقابل أصدقاء وزملاء فى الدراسة من مختلف الأماكن وهيكونوا مختلفين فى التفكير والأهتمامات مثلا...ممكن احد أصدقائك يريد الخروج والسهر على الكافيتيريا وأنت لا تريد ذلك عليك أن تقول (لا) باسلوب محترم . ده علشان تحافظ على العلاقات الاجتماعية بين الأصدقاء ودى مهمه أيضا ولكن كل شىء بوقتة.

2)   الأهتمام بحضور المحاضرات :

من واقع خبراتنا كخرجين مش هنقول انك لازم تحضر كل المحاضرات بالكامل لان ده مش هيحصل. ولكن أنت اللى بتقرر أى من الدكاترة محاضراته مهمة وتقدر تستفيد منه وتتناقش معه اثناء المحاضرة وممكن يفيدك فى سوق العمل بعد كده وأيهم ممكن تأجل محاضرتة أو ممكن تصورها من زميلك وأنت تعمل حاجة مفيده ليك أكثر. وأثناء حضور المحاضرة ممكن تسجل بعض النقاط المهمة اللى بتتشرح.

3)   الاهتمام بالبحث فى الكتب والمراجع :-

فى هذه النقطة بالتحديد لازم تعملها علشان المراجع والكتب الخارجية هتفتح ليك مواضيع اخرى مفيده فى سوق العمل ده لو أنت حابب تخرج من الكلية مستفيد ، وممكن تروح للدكتور وتطلب منه ميعاد لمناقشة بعض الأمور الخاصة بالماده . وعلى فكرة أن الطريقة دى بتوضح للدكتور أى الطلاب مجتهد ويريد العمل وأيهم لا يهتم بما يدرس.ونتيجة للطريقة دى هيهتم بيك الدكتور وممكن يدلك على بعض الشركات والمصانع اللى تتدرب فيها خلال الكلية.لان معظم الدكاترة بيكونوا شغالين مستشارين فى شركات ومصانع خارجية.وهيقولك  تدرس ايه علشان سوق العمل محتاج ده.

4)   التفاعل مع الزملاء والأنشطة الطلابيه:-

وانت فى فترة الكلية مش كل حاجة مذاكرة لازم يكون عندك علاقات وروابط اجتماعية مع أصدقائك ليس معنى كده انك تسيب المذاكرة والدراسة واى شخص يريد أن تخرج معه ويسهر تذهب معه وتضيع وقتك .ارجع الى جزء ادارة الوقت لمعرفة ذلك.

ولكن يوجد بعض المسابقات منها مسابقات (رياضية – دينية – علمية – أدبية -...) اللى بتم فى الجامعة ممكن تشترك فيها، واكيد هتكون صداقات وعلاقات فيها ولكن يجب مراعاة كيفية التعامل مع الأصدقاء وزملاء الدراسة لكى تكسبهم.يجب التفاعل مع الطلاب الأقدم منك فى الكلية والمتميزون لأنهم اكثر طلاب ممكن يفيدوك فى الكليه ويعرفوك الكلية ماشية ازاى وتقدر تستفيد منها باكبر قدر ممكن.

5)   كيفية مذاكرة المواد:

علشان تفتكر النقاط الرئسية للمحاضرة وتساعدك على فهم الماده ممكن تسجل هذة النقاط فى الأجندة الخاصة بالماده ، ولازم تقراء المحاضرة بعد ما تحضرها على الأقل مرة واحده فقط صدقنى هتساعدك كتير لما تيجى تذاكر المادة بجد .والدراسة فى الكلية ليست كلها حفظ وانما يجب عليك قراءة الماده بتمعن وتعرف هى بدور على ايه وبعد ما فهمت الماده ممكن تكتب اللى أنت عاوزة بالطريقة الخاصة بيك مش لازم ذى الكتاب بتاع الدكتور لان الدكتور ممكن يكون واخد الماده من مراجع عامة واكيد المراجع دى بتختلف من شخص لاخر، افهم وبعد كده رتب أفكارك صح هتوفر وقت كتير.ولكن بعد أنت ما ذاكرت الماده وأخذت منها الأستفاده اللى أنت عاوزها واللى ممكن تفيدك فى سوق العمل.ممكن تدخل الامتحان النهائى وتجد ان درجات متدنية وأنك مذاكر الماده كويس وكان لازم تجيب درجات أعلى من كده .أهم حاجة فى الدراسة هو معرفة سير الكلية ايه ، بمعنى لازم تسأل الطلاب القدام ايه هو أسلوب الدكتور فى وضع الأمتحان أكيد هيفيدوك بنسبة حوالى 60% .

وطريقة أخرى ممكن تحصل على الأمتحانات السابقة للمادة فى الأعوام السابقة ومعرفة طريقة الدكتور فى وضع الأمتحان.ممكن ده هيوفر عليك مجهود كبير فى الدراسة وتتفرغ أنك تكسب معلومات وتدرس حاجات أخرى تفيدك فى سوق العمل.

شكرا لقراتكم للموضوع ، وهيكون فى تكمله للموضوع ازاى تستفيد من فترة دراستك فى الكلية وتنجح فيها بكل سهوله ، لو حابب تضيف أى معلومة اخرى ممكن تكتبها فى تعليق أسف الموضوع  لكى يستفيد الجميع . تابعونا