محاسب حديث التخرج....وعايز تشتغل .....الحق نفسك! نصايح فى غاية الأهمية من خبرات خريجين.

لو أنت محاسب لسه حديث التخرج او عندك خبرة فى مجال المحاسبة وعاوز تطور نفسك وتكون عبقرى محاسبة وتتقدم الى أى وظيفة  وانت قلبك جامد وواثق فى نفسك وخبراتك والمهارات اللى عندك ان شاء الله هنتكلم مع بعض شويه فى الحكاية دى وكل  اللى هتقرائه من واقع  خبرات  محاسبين فى أرقى المناصب يعنى مش كلام كتب وبس لأن فى موقع خبرات خريج احنا تعبنا فى بداية حياتنا وقلنا نوفر عليكم الفترة دى وننقل لكم خبراتنا علشان تستفيدوا منها قدر المستطاع .

فرجاء اكمل الموضوع الى النهاية لأن كل كلمة عبارة عن خبرة سنين.....نبدأ على بركة الله.

أولا : وأنت لسه طالب فى كلية التجارة ، ماذا تفعل؟

طبعا الفقرة دى للطلاب اللى لسة متخرجوش من الكلية ولسة قدامهم فرصة للمذاكرة والاجتهاد.

1- التقدير واللغة:

يقول محمود احد الطلاب خريج كلية تجارة لما اتخرجت من الكلية  وطبعا شفت الجيش بتاعى وخلصته ،حبيت أشوف سوق العمل وادور على وظيفة كويسة  بس للاسف اتصدمت من الواقع المرير لآن شغل المحاسبة خصوصا يتطلب ان تكون معك تقدير كويس وايضا لغة او أكثر ده لو أنت عاوز تشتغل فى وظيفة محاسب كويسة وبمرتب مجزى مثلا فى بنك او فى شركة بترول.

اولا التقدير:

لازم تذاكر كويس وتحاول تحصل على تقدير مرتفع لانك لو اتخرجت بتقدير مقبول مش هيكون ليك فرصة انك تشتغل فى مجال البترول أو البنوك  حتى لو معاك واسطة بكل صراحة هيكون الموضوع صعب  ومش مهم الكلية اللى اتخرجت منها منين يعنى مش مهم تجارة القاهرة من اسكندرية من طنطا.....أهم شىء يكون السى فى (CV) بتاعك يكون تقيل.

ومتقلش ان تجارة القاهرة أحسن من طنطا أو العكس ،سوق العمل لم يعد يعترف بهذه الأشياء أهم حاجة يكون عندك خبرة ومعاك لغه وأشياء أخرى.فياريت تذاكر وتحاول تجتهد للحصول على تقدير كويس. وعلشان تنجح فى الكلية بأقل مجهود وأكثر استفاده ممكن تقرا المقال ده اسرار النجاح فى الدراسة الجامعية.

ثانيا اللغة:

طبعا فى فرق كبير لما تكون مقدم على وظيفة وأنت معاك لغة واحده او لغتين أو ممعكش أى لغة لو أنت صاحب شركة واتقدملك الثلاث موظفين  هتختار أى شخص فيهم .....أكيد أنت عرفت الأجابة على السؤال ده. فحاول تأخد كورس لغة وتكون متقن هذة اللغة كتابة وتحدث ، صدقنى هتفرق فى الCV  بتاعك كتير وهتعطى لك قيمة وهيكون ليك الافضلية عند التقدم لوظيفة. بس ميكونش شهاده بس يعنى لازم تتقن اللغة عن ظهر قلب.

2- تعلم الكمبيوتر:

لاشك أن أى اعلان على وظيفة بيكون مكتوب من ضمن شروط التقدم للوظيفة أن يكون المتقدم يجيد استعمال الكمبيوتر ، فلازم تتعلم ازاى تتعامل مع الكمبيوتر بكل احترافية وخصوصا البرامج مثل(اكسيل – اكسيس-....)

3- اشترك فى المنتديات وزود معلوماتك فى مجالك:

وانت فى فترة الدراسة لازم تستغل الفترة دى على أحسن وجه وأنك تسأل فى كل حاجة وتعرف تجيب المعلومة منين ، وطبعا النت والمعلومات اللى عليه هتساعدك كتير فلازم تدخل على مواقع ومنتديات فى مجال تخصصك وهتلاقى طلاب وخرجين  هيسعدوك كثيرا. وبرده هتلاقى فديوهات وشروحات فى جميع التخصصات.

4- القراءة:

لازم تقرأ كتب فى مجال تخصص وانت فى المواصلات نزل كتاب على موبيلك وأكيد كل واحد معاه موبيل  وانت مسافر للكلية حاول تقراء على الأقل لو 3 أو 5 صفحات فى اليوم صدقنى هيفتح مخك كتير وهيعرفك على حاجات اكثر.

ثانيا : بعد التخرج من الكلية.

أكيد كل طالب اتخرج من الكلية أهم حاجة عنده انه يدور على وظيفة كويسة وفى مكان كويس ويعرف يدرج فيها ويوصل لمنصب كويس علشان كده هنقولك أهم خبراتنا فى المجال ده وأزاى تحصل على وظيفة.

·        لو انت معملتش اللى مطلوب منك وأنت طالب فى فترة الكلية يبقى أنت أكيد متاخر كتير عن سوق العمل وأكيد هتتعب شويه بس أكيد لازم توصل أن شاء الله للى انت عاوزة وبتحبه بس مع شويه مجهود ودراسة . يعنى لو معكش لغة لازم تحط جدول لنفسك وطبق اللغة صح علشان تقدر تتعلمها كتابة وتحدث . ولازم تطلع على الجديد فى سوق العمل من خلال المواقع على النت وتسأل الناس اللى اكبر منك فى المجال تتعلم ايه علشان اعرف أشتغل فى مجالى.

·        لكن لو انت عملت اللى مطلوب منك وأنت طالب يبقى مهمتك سهل ان شاء الله واكيد هتلاقى وظيفة كويسة  وتعلى فيها وتوصل للى أنت عاوزه .

سواء كنت عملت اللى عليك فى فترة الدراسة أو لا  فى شوية نصائح ليك بعد تخرجك من الكلية علشان تشتغل فى سوق العمل والنصائح دى مش نصائح كتب وخلاص ولكن هى نصائح اكتسبنها من الخبرة فى السوق وهى كالأتى:

1- حاول تقبل أى وظيفة تحصل عليها تدخل فى مجال عملك  ومتقلش لا الوظيفة دى مش مناسبة ليا أنا عاوز حاجة أحسن. بس متكنش أى وظيفة وخلاص، وظيفة أنت عارف أنك هتستفاد خبرة منها وتتعلم منها وتزود خبرتك ، ومع الوقت انت هتثبت نفسك فى مكانك. ليه أنا قلت تقبل الوظيفة لانك هتدخل فى سوق العمل وههتعرف على ناس فى شركات أخرى ممكن تشتغل فى الشركة شهر أو شهرين ويتفتحلك سكه تانية ويجيلك شغل فى شركة تانية لانك اتعاملت من الناس وكلمت ناس وكونت صداقات عمل و فى زملأء عمل شغالين معاك وبيقترحوا عليك أماكن أحسن . فلازم تتعامل مع زميلك فى الشغل بكل حب واحترام مهمه جدا جدا. وعلشان تعرف تتعامل مع زميلك فى العمل وتكون صداقات حقيقية معهم أقرا الموضوع ده فن التعامل مع زملاء العمل اسرار النجاح فى العمل.

2- عدم التباهى بالتقدير والغطرسة بيه وعلى أساس ذلك عليك القبول بالتدريب تحت أدارة شخص أقل منك فى التقدير ولكنه أعلى منك فى الخبرة .والخبرة هنا هى الفيصل الوحيد  وبعد كده أنت هتثبت مكانتك فى الشغل.

3- لا تنظر الى العائد المادى وعليك قبول الوظيفة بالمرتب المتاح كل ده علشان تدخل سوق العمل وتحتك بالمجال من قريب . وتكتسب الخبرة المطلوبة اللى هتأهلك لشغل أحسن فى مكان أحسن وبمرتب أحسن.

4- ليس من العيب أنك تسال عن اى شىء لا تعرفة  ولكن العيب انك تظل جاهل بالأمور التى تدور حولك.لذلك حاول تسأل المتواجدين معاك فى الشغل عن أى شىء لا تفهمه وأكيد هيسعدوك ولازم تتاكد ان المعلومات دى صحيحة ، وضع فى اعتبارك ان الغلط هو أساس التعلم وثبات المعلومة ، مش عيب أنك تسأل وتغلط وتتعلم ...

فى النهاية  وليست نهايه خبراتنا ، نرجوا من الله أن نكون قد أجبنا على الكثير من الأسلة التى تدور فى عقلك ولو عندك اى سؤال وعاوز تعرف اجابتة ممكن تتركه فى التعليق. ولو عندك خبرة وحابب تضيفها تفضل لعل الكل يستفيد .

ولو حابب نتكلم فى موضوع معين ممكن برده تتركة فى التعليق......