الجزء الأول أهم 20 سؤال فى الأنترفيو والأجابات المناسبة لهم.أسئلة المقابلة الشخصية |خبرات خريجين|

طبعا لو أنت طالب لسة حديث التخرج أو عندك خبرة بسيطة فى مجال العمل والوظائف بيكون عندك فضول أنك تعرف ما يحدث فى المقابلات الشخصية (الانترفيو) وايه هى الاسئلة اللى ممكن تتسأل فى المقابلات دى علشان كده جمعنا خبرات العاملين فى سوق العمل وبرده رؤساء الشركات والمصانع وسألناهم ايه اللى بيحصل فى المقابلة الشخصية أو مقابلة العمل وما هى الأسئلة التى تطرح عليكم أثناء المقابلة وجمعنا معظمها هنا فى موقع خبرات خريج ، كما  وعدناكم أن كل كلمة تكتب هنا هى من خبرات الخريجين على أرض الواقع وليس مجرد كلام نظرى فى الكتب.

-         طبعا بعد ما أنت عرفت كيفية كتابة سيرة ذاتية أحترافية تقنع بها صاحب العمل ولو مش عارف الموضوع بسيط جدا وسهل ان شاء الله ممكن تقرأ الموضوع ده وبرده تم كتابته من واقع خبرات خريجين نصائح كتابة السيرة الذاتية.

-         وطبعا بعد ما انت عارف أزاى تستعد لعمل مقابلة شخصية (interview)وبرده  لو مش عارف ممكن تقرا المقال ده كيفية عمل مقابلةشخصية interview انترفيو من أجل الحصول علىوظيفة؟

نأتى الى أهم جزء وهو الأسئلة التى تطرح أثناء المقابلة الشخصية وكيفية الأجابة عليها.....رجاء أكمل الموضوع الى الأخر لعل وعسى يتم سؤالك بسؤال من ضمن هذه الأسئلة.

1)    أخبرنا أكثر عن نفسك؟ أو احكى لنا عن نفسك؟

فى هذا السؤال هو عاوز يعرف اكثر عن حياتك المهنية والتعليمية وليس عن حياتك الأسرية أو الشخصية ولا تخبرة باسمك ولا سنك لانه هيكون معاه نسخة من السيرة الذاتية الخاصة بيك وهيناديك باسمك لان معلوماتك قدامه ، ممكن تخبره باهتماماتك وأنك طموح وبتأمل فى مستقبل أفضل ليك.لازم تكون ذكى فى أجابتك دى بحيث يعرف أنك شاب/شابة مجتهد وطموحه.

2)    لماذا ترغب فى الحصول على هذه الوظيفة؟

فى هذا السؤال اوعى تبين انك محتاج الوظيفة لدرجة كبيرة علشان تحسن مستواك المادى أو أنك محتاج شغل فى الوقت ده بكده هو هيعرف أنك مش هضيف أى جديد الى الشركة ولاتملك مهارات تؤهلك لهذه الوظيفة. الاجابة النموذجية هى تقول انك قرات الأعلان الخاص بالوظيفة وقرأت الشروط الموجوده و وجدت انى ممكن أفيد الشركة فى النقطة دى من واقع خبرتى فى المجال وامتلك المهارات لفعل ذلك ، وممكن تشرح جزء بسيط يؤكد كلامك وده هيدعم موقفك فى المقابلة. وأيضا ممكن تضيف جزء أنك تريد زيادة خبرتك من خلال عملك مع فريق عمل ممتاز يملك خبرة كافية فى مجال العمل.

3)    لماذا يجب علينا توظيفك أنت بالتحديد؟ / ماذا سوف تقدم للشركة؟

  فى هذا الجزء ممكن تكون الأجابة قريب من الاجابة السابقة وممكن تضيف أنك ممكن تضيف شىء جديد   للشركة من واقع خبرتك والمهارات اللى بتمتلكها ولو أنت قرات جزء عن الشركة ممكن تتكلم فى بعض المعلومات اللى تخص الشركة وأزاى ممكن تطور الجزء ده.

4)    ماذا تعرف عن الشركة؟

طبعا أكيد قبل ما تروح الانترفيو بتكون بحثت عن الشركة وعرفت معلومات كافية عنها وعن الخدمات اللى بتقدمها للجمهور ، وممكن تعرف فروعها أيضا وأيه هى طبيعة المنتجات اللى بتقدمها للناس وممكن توضح ليهم ايه رأى الناس فى الخدمات اللى بيقدموها وازاى ممكن تساعدهم فى تحسين جودتها وزيادة مبيعاتهم.

5)    ما هى مؤهلاتك للحصول على هذه الوظيفة؟

طبعا فى هذا الجزء هو عاوز يعرف مهاراتك وخبراتك اللى حصلت عليها قبل ذلك لو كنت أشتغلت قبل كده هييكون سهل عليك أنك تذكر له خبراتك اللى اكتسبتها فى من عملك فى السابق واللى يختص بالوظيفة الحالية يعنى متتكلمش فى أشياء لا تخص الوظيفة . لو انت بقى حديث التخرج ومشتغلتش قبل كد ممكن تذكر له الدوارات اللى انت اخذتها فى فترة الدراسة وانك بتعرف تشتغل مع فريق عمل ومتعاون بشده لكى تنجز العمل على أفضل وجه.وخليك ذكى لازم تذكر اولا المهارات اللى الوظيفة بتطلبها وبعد كده ممكن تقول باقى مهارات اللى حصلت عليها.

6)    لماذا تركت عملك السابق؟

هنا لازم تكون منتبه جدا علشان هو عاوز يعرف أنك هتتكلمك عن مكان شغلك السابق بطريقة كويسة ولا هتذكره بأشياء سلبية لأنك ممكن برده تعمل كده معاه لو قررت تسيب الشغل.فلازم تتكلم بطريقة كويسة وتكون أجابتك كده لأنى اشتغلت فى هذه الشركة فترة كافية وأخذت خبرة كافية وأريد تجديد حياتى وأكتساب خبرات أخرى.  أو  ان الشركة يتم أعادة هيكلتها وتنظيمها من جديد لذلك بحثت عن شركة أخرى أستطيع ان أفيدها بمهاراتى وأيضا أكتسب خبرات أخرى وأتعامل مع فريق عمل أخر.

7)    كيف تركت عملك السابق؟

هو عاوز يعرف لو قررت أنك تسيب الشغل معاهم هتتصرف أزاى ، وطبعا هنا هتقول أنك أخبرت رئيسك فى العمل أنك حصلت على فرصة أخرى فى مكان أخر وتريد ترك مكانك لكى يستفيد شخص اخر.وأخبرتة بهذ الكلام بفترة كافية حتى يستطيع ايجاد الشخص المناسب لكى يحل محلك  وأيضا قمت بترشيح بعض الاشخاص الممتازين للعمل فى هذه الوظيفة وعلى درجة عالية من الكفاءه.

وبكده هو هيكون واثق أنك مش هتسيب مكانك فى الشغل فجأه وتتركة ينهار لأنك بتكون مسئول عن جزء معين  فى الشركة ، مهمه جدا هذا الجزء.

8)    كيف تستطيع تقيم نفسك فى العمل؟

هو عاوز يعرف أنت بتهتم بانجاز عملك ولا عادى سايب كل حاجة كده ماشية ذى ماهى ماشية وخلاص ،  لازم تقول انك بتضع لنفسك أهداف معينة فى وقت معين لازم تحققها وتضع هذه الاهداف على أساس علمى يحقق لها النجاح و التميز. وتضع لها خطط عمل مع فريق متعاون لكى تظهر له انك بتحب تشتغل مع فريق وعندك روح التعاون مع الأخرين.

9)    ما الذى احببته فى عملك السابق وما الذى لم تحبه؟

لا تذكر أى اساءة الى أى شخص او الى نظام بعينة ولكن ممكن تتحدث عن الأيجابيات اللى كانت  فى شركتك السابق من حيث ان فريق العمل كان متعاون جدا وكنا بنشتغل واحنا حبين الشغل علشان نقدر نخلى الشركة تذدهر فى مجالها وهكذا.

والجزء الذى لاتحبة مثلا اذكر انه لا يوجد جديد من حيث عدم وجود تجديد فى الاجهزة المستخدمه والماكينات من أجل مواكبة التطور الصناعى أو التكنولوجى ، وبكده هيعرف انك متحمس للشغل وبدور على الجديد دائما ومتطلع الى الأحدث باستمرار.

10) ما هى أهداف المستقبلية أو فى أى مكان ترى نفسك بعد خمس سنوات؟

نركز مع بعض كده شوية لان السؤال ده بيتسأل كتير فى الأنترفيو بصيغ كثيرة مثلا أنت شايف نفسك فين فى الشركة بعد فترة ؟ -  أيه هى طموحاتك بعد كده ؟   -   أنت مخطط لمستقبلك أزاى ؟ وهكذا ..

الغرض من السؤال ده أنه يعرف أنك شخص طموح ولا ايه وهل طموحك ده فى حدود المعقول ولا أنت بتقول أى كلام وخلاص يعنى لو أنت قلت أنك عاوز تمسك منصب مدير الشركة بعد خمس سنوات هيقلك اطلع بره على طول وهتستبعد من الوظيفة فى الحال.

لازم تكون عاقل فى طموحاتك بحيث أنك تستطيع تحقيقها ، بالتالى ممكن تقول أنك عاوز تنفذ شغلك على أكمل وجه علشان تكتسب الخبرة والمهارة اللى تؤهلك للحصول على منصب أخر فى الشركة، وتضع نفسك فى تحدى جديد لانجازه.

تابعونا فى الجزء الثانى من اهم 20 سؤال فى المقابلات الشخصية ومقابلات العمل  والأجابه عليهم.

وفى النهاية وليست نهاية خبرتنا نرجوا أن نكون قد أجبنا عليكم فى أى استفسار،  ونرجوا أن تكون هذه المعلومات قد أفادتكم . ونرحب بأى تعليق  فلو عندك أى سؤال أو استفسار بخصوص شىء معين تفضل بكتابته فى التعليق وسوف نرد عليك بأسرع وقت .ولو عندك خبرة حابب تشاركها معانا نرجوا أيضا كتابتها فى التعليق ليستفيد الجميع